1-2 kun oldin forma validatsiyasi bilan bog'liq vazifa ustida ishlayotgandim. Foydalanuvchi bank hisob raqamini verifikatsiyadan o'tkazishi uchun unga jo'natilgan 2 ta mikrodeposit qiymatlarini formaga kiritishi kerak. Formada buning uchun 2 ta input bor.

Kiritilgan qiymatlar to'g'riligina faqat serverga request jo'natish orqali bilish mumkin. Agar foydalanuvchi qiymatlarni xato kiritisa, forma xatolik xabarini ko'rsatishi va verifikatsiya tugmasi "disabled", ya'ni bosilmaydigan holatga tushishi kerak.

Vazifaning qiziq tarafi shundaki, foydalanuvchi oldin xato kiritgan qiymatlarni yana kiritmoqchi bo'lsa, serverga request jo'natmay turib formada xatolik ko'rsatish kerak bo'ladi. Buning uchun albatta oldin kiritilgan xato qiymatlarni massivda saqlab borishimiz kerak. Forma submit qilinganda esa request jo'natishdan oldin, qiymatlar oldin xato kiritilganlar orasida yo'qligini tekshirishimiz kerak.

const invalidValues = []; // Array<[number, number]>

function isInvalid(values) {
  return !!invalidValues.find(
      ([a, b]) => a === values[0] && b === values[1]
  );
}

isInvalid([12, 3]);

E'tibor bersangiz isInvalid funksiyasi bizga javob berishi uchun har bitta xato kiritilgan qiymatlar ustidan yurib chiqishi kerak. Uning ustida 2 ta qiymatning har birini tenglikka tekshirish ham bor. Kod mujmallashyapti! Ustiga ustak "Time-complexity" tarafdan bu algoritm O(n) da ishlaydi. Xo'sh, buni konstataga, O(1) ga tushira olamizmi?

Ha, bu vaziyatda masalaga bunchalik chuqurlashish noo'rin. Chunki foydalanuvchi nari borsa 3 marta xato kiritar. 3 ta elementlik massivda qidiruv qilish "qiyomat emas", albatta. Lekin bu yerda asosiy gap kodni soddalashtirish haqida.

Qidiruv algoritmlarini tezlashtirish uchun hashmap, set kabi ma'lumotlar tuzilmalaridan foydalaniladi. Biz ham bu yerda JS'ning Set obyektidan foydalansak bo'ladi.

const invalidValues = new Set(); // Set<[number, number]>

function isInvalid(values) {
  return invalidValues.has(values);
}

isInvalid([12, 3]);

Lekin Setga Array joylagan bilan JS ularni qiymatlari bilan tekshirmaydi-ku! Array obyekt bo'lgani uchun faqat reference orqali tenglikka tekshira olamiz. Aynan o'sha o'zgaruvchi bilan qidirmasak, Set.has bizga har doim false qaytaradi.

Xato qiymatlar jufligini Tuple qilib saqlay olganimizda bunday muammo bo'lmasdi! Chunki tuple'lar primitiv va ularni bemalol tenglikka O(1) da tekshirsak bo'ladi. Quyida invalidValues o'zida tuple'larni saqlovchi Set'ga teng.

const invalidValues = new Set(); // Set<#[number, number]>

function isInvalid(values) {
  return invalidValues.has(values);
}

isInvalid(#[12, 3]);

Ahamiyat bering isInvalid funksiyani endi oddiy Array emas, Tuple tipidagi argument bilan chaqirayapmiz. Kodimiz juda ixcham va o'qishga juda qulay. Har qanday dastuchi bitta qarab nima bo'layotganini aytib bera oladi. Undan tashqari, bu kod formaga kiritilgan xato qiymatlarni aniqlashni konstata vaqtda bajaradi, ya'ni O(1) time-complexity!

Afsuski, hali tuple'lar JS'ga rasmiy ravishda kiritlgani yo'q shuning uchun bu usuldan hozircha foydalana olmayman. Va albatta, yuqorida ta'kidlagan sabablarim bo'yicha bu kichik optimizatsiya unchalik ham ahamiyatli emas. Shuning uchun kodni 1-usuldagidek qoldirdim.